PITUAH MANDEH
Dapek inspirasi nasehat mandeh dari kawan di facebook
mudah mudahan baguno jo dunsanak sadonyo
 |
| mandeh - eparewa.net |
"PITUAH MANDEH"
Elok elok anak dirantau,
Lauik SATI rantau BATUAH
Usah lupo pai KASURAU,
Jikok barasaki basidakah
Rantangkan tali untuak ka tungkek nak,
Jalin kulindan diateh bumi
Hubungan jo ALLAH dipa arek, nak
Parapek pulo sasamo insani
Hilia kabukik rimbo panjang,
Tikuluak nan usah ditanggai
Usah ditompang hati gadang,
Isuak nyo badan jadi sansai
Dikameh sagalo kameh
Dek padi iyo sagalo jadi
Usah anak bamaleh maleh
Rajin rajin anak mancari
Kok lai barasaki banyak'
saketek paralu disimpan juo
Kanalah badan katalatak,
Ingeklah nanti awak ka tuo
Usah maminum sadaguik abih,
Mamakan usah sakulek hilang
Bahemat hemat jikok bapitih,
Balanjo nan usah gadang-gadang
Tangguak rapek karuntuang jarang,
Dimanolah ikan katabao
Gaji ketek balanjo kok gadang,
Alamat badan kasansaro
Kawan galak mudah dicari,
Kawan manangih jarang basuo
Galak tabahak dimeja judi,
Manangih surang dipanjaro
Usah main bahuru huru,
Pai malala kian kamari
Pandai padailah mambagi waktu'
Baik siang maupun malam hari
Jikok minum dikadai kopi,
Minumlah kopi nan samangkuak
Jauhilah wisky jo berendy,
Usah minum nan mambuek mabuak
Kurai taji pakan sinayan,
Urang manjua lado mudo
Capek kaki ringan tangan,
Namun salero kalapeh juo
Capek kaki usah panaruang,
Capek tangan usah manyambo
Kadalam tansi lalok baguluang,
Sasa tumbuah dak ado guno
Apo talatak nak maambiek,
Apo tajumbai nak maelo
Hiduik didunia indak salamaek,
Mati basinggang dinarako
Jiko anak pai ka pulau,
Hiu bali balanak baliI
Ikan panjang bali lah dahulu
Jikok anak pai marantau
Ibu cari dunsanak cari,
Induak samang cari dahulu
Jikok pandai bakain panjang,
Labiah elok bakain saruang
Jikok pandai bainduak samang,
Labiah elok dari mandeh kanduang
Tagaklah anak di nan data ,
Tagak diadat jo aturan
Badirilah anak di nan bana,
Munkin jo patuik ka ukuran
Kalau sipadan diasak urang,
Nan bana nyo tuka tagak
Tunjuakkan awak sabagai Rang minang,
Usahlah takuik darah taserak
Darah ayah turun ka anak,
Warih dijawek dek kamanakan
Usah mundur walau satapak,
Hadok i malah sacaro jantan
Kok pai anak ka batawi,
Mancari pitih dirantau urang
Usah sampai tajarek kaki,
Sahinggo lupo jo Ranah minang
Jam gadang di Bukik tinggi,
Nan Talatak dipasa ateh
Disimpang jalan kampuang cino,
Pandai mangarang urang di batawi
Bungo dibuek dari karateh,
Takicuahlah kumbang dibueknyo
Bungo harum warnanyo merah,
Nan banyak tumbuah ditapi jalan
Bungo baracun mintak darah,
Lah banyak kumbang jadi korban
Randahnyo jambo jamboan,
Mudahlah bana mamatiaknyo
Sakiro anak indak bariman,
Alamat badan kanarako
Jiko buliah kandak bakandak,
Iyo sasuai jo nan salero
Iduak bareh handaklah rang awak,
Urang awak minantu bundo
Carilah gadih nan rancak,
Nan baik budi nan elok baso
Didalam wilayah nan TIGO LUAK,
Iyo didaerah ranah bundo
Gadih nan jombang pandai mamasak,
Urangnyo saulah elok laku
Manih juo walau tak babadak,
Bibianyo merah tak bagincu
Pandai masak jo marandang,
Pandai manjaik jo marendo
pandai mangaji ta'at sumbayang,
Rajin sidakah ta'at puaso
Kuliknyo nan kuniang lansek,
Balasuang pipik dipipinyo
Paibo ka urang gaek,
Panyayang kasanak sudaro
Laguah lagah bunyi padati,
Padati anak urang kamang
Mambao patai nan jo lado
Bialah sapiriang dapek pagi
Walaupun sasuok dapek patang
Ijan lah sampai baputuih aso
Ijuak kok nyato jd tali,
Anau dirimbo kanalah juo
Isuak kok ado Ba rasaki,
Usah lupo sanak sudaro
Bialah luluah padi dek sakam,
Namun dadak baniahkan juo
Bialah rusuah hati didalam,
Namun galak manihkan juo
Bakabuik gunuang Talamau
Hilang ditimpo paneh pagi
Usah hanyuik buyuang dirantau,
Jalang juo sanak famili
Jikok kaladang buyuang bisuak,
Padi nan indak ado lai
Namun banto siangi juo,
Jikok pulang buyuang bisuak
Kami nan indak ado lai,
Namun pusaro siangi juo
Babuek baiak pado padoi ,
Babuek buruak sakali jangan
Jan sampai taniayo diri,
Sayang ka urang jajok dibadan
Dulu Tasabuik Naneh Halaban
Manihnyo bak raso ka Rangkungan
Itulah pasan Mandeh nan harus dijalankan...
Jan sampai manyasa di kamudian...
"Aku Bangga Menjadi Anak Minangkabau"
0 comments:
Post a Comment